Deputeti i Lëvizjes Socialiste për Integrim Nasip Naço, denoncoi sot shkeljet dhe presionet ndaj përfaqësuesve të Bashkisë Skrapar.

Ai tha se disa muaj më parë, përfaqësues të Partisë Socialiste të dirigjuar nga deputeti i tyre bllokuan ndihmën ekonomike për rreth 600 familje duke bërë presion në shkëmbim të votës.

“Sot përsëri të dirigjuar prej tyre, dega e Thesarit Skrapar, në kundërshtim më çdo akt ligjor dhe nënligjor ka bllokuar veprimtaritë financiare: 1-furnizimin me ujë të konvikteve, 2-furnizimin me ujë të çerdheve, 3-furnizimin me ushqim të qendrës së fëmijëve me aftësi të kufizuar, 4-pagat e punonjësve, si dhe ka bllokuar çdo shërbim ndaj komunitetit. Zonja Ministre e Financave! Ju drejtohem publikisht të urdhëroni menjëherë degën e thesarit Skrapar për të zhbllokuar këtë gjendje kriminale, shkarkimin e menjëhershëm të drejtuesve të këtij institucioni dhe të kërkoni ndjekjen penale të tyre”, u shpreh Naço.

Në mbështetje të nenit 41 të ligjit nr 68 të vitit 2017 të financave të qeverisjes vendore të nenit 37 të ligjit nr 9936 për menaxhimin e sistemit buxhetor në Republikën e Shqipërisë si dhe të udhëzimit nr 9 datë 20.03.2018 për procedurat standard të zbatimit të buxheti, ai kërkoi që të urdhërohet dega e thesarit Skrapar që të zhbllokojë veprimet financiare të Bashkisë Skrapar duke i lejuar të kryejnë veprimet sipas ligjit dhe udhëzimit të mësipërm.

Ai iu drejtua ministres Anila Denaj, se nëse nuk ndërmerr asnjë veprim në zbatim të ligjit i lind e drejta t’ju thotë publikisht se është urdhëruesja dhe zbatuesja e kësaj vepre kriminale.

“Zonja Ministre, mos e filloni dhe mbaroni karrierën tuaj politike me këtë veprim kriminal. Zoti Kryeministër, po ju drejtohem publikisht që të ndërhyni menjëherë dhe të zhbllokohet kjo situatë kriminale, të shkarkoni menjëherë Prefektin e Qarkut të Beratit dhe të kërkoni ndjekjen penale të tij. Zoti Kryeministër, nëse ju nuk ndërhyni në zhbllokimin e kësaj situate që të lejoni Bashkinë Skrapar që të ushtrojë veprimtarinë e saj me 1/12 e buxhetit, siç e parashikon Ligji dhe Udhëzimi përkatës, atëherë jeni ju urdhëruesit dhe zbatuesit e këtij veprimi kriminal. Përgjegjësia morale, ligjore dhe politike do bjerë vetëm mbi ju”, deklaroi Naço.